San Sadurniño, 11 de setembro de 2008
O Concello de San Sadurniño, en colaboración coa asociación EuroEume, e coa participación da empresa Proxectos consultoría e formación, decidiu pór en marcha en 2008 un dos compromisos electorais que tiña o grupo de goberno de cara a mellorar a praxe democrática e achegarse ás necesidades reais dos seus veciños e veciñas.
Así vai desenvolver dun xeito estruturado e regulado o proceso de implantación do chamado Orzamento participativo.
Esta é unha experiencia novidosa no noso contorno, e polo tanto ten que plantexarse como unha iniciativa experimental, suxeita polo tanto a modificacións que leven a crear un modelo de Orzamento participativo axeitado ás características e ás necesidades dun concello como San Sadurniño.
Debido a que aquí non valen os modelos de Orzamento Participativo aplicados en hábitats concentrados, decidiuse deseñar e desenvolver un modelo propio, adaptado á realidade rural galega.
Esta primeira convocatoria decorrerá ó longo do segundo semestre de 2008 para que as súas conclusións sexan aplicables no orzamento municipal de 2009.
Poderán participar todos os veciños e veciñas do concello de maiores de 16 anos, e abondará con encher unha ficha coa súa proposta, que deben facer chegar ó concello
Todas as propostas recibidas serán presentadas publicamente en cada unha das parroquias nunha asemblea aberta e os veciños e veciñas seleccionarán as tres mellores en cada parroquia.
Despois de debater e votar cales son as propostas máis interesantes a mediados de outubro terá lugar a Mesa de Orzamentos na que estarán presentes os representantes parroquiais elixidos democraticamente nas Asembleas e un Comité técnico. Desta Mesa sairán as propostas que, logo dun período de alegacións, serán incluídas nos Orzamentos Municipais do ano 2009.
Como colofón a todo o proceso, terá lugar un Acto Público a mediados de Novembro na Casa da Cultura, para presentar as propostas aprobadas.
Todo este proceso será explicado á cidadanía e ós medios de comunicación o sábado 13 de setembro, ás 12 horas, na Casa da Cultura de San Sadurniño.
Asemade, inclúense nuns arquivos anexos, as Bases Reguladoras do Orzamento Participativo e unha ficha para presentar as propostas de ideas, que poderán facela chegar ó Concello por calquera das seguintes vías:
– Entregándoa no Rexistro municipal
– Enviando un Fax dirixido ó Concello (fax: 981 490 474)
– Remitindo unha carta ao Concello (Enderezo: Avda. Marqués de Figueroa s/n 15560 San Sadurniño)
– Mandando un correo electrónico á conta: orzamentoparticipativo@sandadurnino.es
– Depositando o formulario nas caixas de suxestión situadas nos seguintes puntos:
• Casa do Concello
• Centro de Saúde
• Colexio
• Locais das asociacións de veciños e veciñas
• Outros lugares de encontro
Documentos de Interés:
